عمتي طوطو تكتب: إن لم تخونني الذاكرة… “حفات لي الكاسيطة” !!!
تشهيت غير شي عراضة والله العظيم… ويتجمعوا فيها گاع الحباب والصحاب… بحال ديال أيام زمان… وشي هاضر مع شي… وشي كاينمم فشي وغير بالخير..والدراري الصغار يدوروا لك بين رجليك وبين جلايلك ويخطفوا لك الحلوى من الطبسيل هههه .
وشي كاسيطة د زمان فيها غير أغاني عبد الهادي بلخياط بحال زعما ” القمرالأحمر” ولا بهيجة ادربس ” الما يجري قدامي” ولا ” ايلا غاب كاس البلار يبقى گلبي محتار خايف عليه” لفتح الله المغاري ولا شي عيطة من دياول المرساوي وناكلوا الي قسم الله وحنا كانشكروا فالي وجداتو الله يعطيها الصحة والله يعطي للرجالة العمى ههههه ومنين نتفارقوا ما نسخاوش باللمة الزينة وحنا كانتسالموا نضربوا موعد آخر زوين ونمشيوا فحالنا وحنا كانتحكاوا على المجمع الزين مع الناس الزوينة…. شنو وقع!!!! وا شنو واقع!!! ما بقيناش نستحملوا حتى ريوسنا!!!!
وشي قاني لشي…. أوووف…. ايوا شكون الي يعرض علي!!!!
ملاحظة.. أنا هي هاديك الي كانت ما بين دوك الدراري الي كايدوروا ما بين الجلايل هههه
للحديث بقية
#عمتي_ طوطو
