عمتي طوطو تكتب إن لم تخونني الذاكرة..ويامات جمع المينيكاط في تقشيرة
أنا عندي حنين….
واحنا أطفال ما خليت ما لعبت كنا كانلعبوا بزاف مع ولاد الدرب والبنات حتى هما ماكانش عندي مع الدريات بزاف كان فيهم التولويل وكايديروا الفرقة د الراس بالفيليلات وبغات تولي مرا بزز ههههه …
كان كايعجبني نلعب الفيتش ومالا قروضي والزدينيفري أڤومارك پري پارتي هههه كانديروا الدورة على الدرب من الراس حتى للراس وكانرجعوا منين بدينا… وايلا مابغاوش يلعبوني كاندير حاروما الطرح يا نجريوا كاملين يا نگلسوا كاملين هههه….
والمينيگاط كانت كاتعجبني هاديك زروقي وكانت فيه بزاف التركيز مانكز ههههه والنهار الزوين منين كانجمع بزاف وكانديرهم في تقشيرة ونبدا نخرشش فيهم هههه كانت مريامة أختي حاطة علي كاتلوحهم لي ???????????? …والنگ في فصل الشتاء حيت كاتكون الأرض ساردة وكاتجي الضربة فيها زوينة واحد النهار عصبني ولد دربنا مصطفى وأنا نيش عليه بإيدي العسرية كنت غادي نتقب ليه عبنيه الليمنية على بونت وكنت نمشي للإصلاحية هههه كل فصل وكان عندو لعبو… شحال لعبت بالحبل ولاستيك وما فهمتش علاش ما طواليتش بقيت لاصقة في الأرض????????????…
كنا مانلقاوا مانديروا كانطلعوا لحي الكريمات كانت غير الارض خضرا كنا نقلعوا هاديك مسكة الجمل ونمدغوها وشوكة حمار ‘وهداك الورد الصفر والليموني الي غادي للاحمرههههه… وكنا نكملوها في الصيف بالكارطة مع السوطة الغاملة والرامي والطالاج بالجوك…. حاجة وحدة الي عمرني فهمتها شنو كاتعني هي منين كنا كانغنيوها ونلعبوها “” أفيليلي زيزي گوا گوا على مدى هههه””” الي عاقل عليها أو لعبها يفهمها لي الله يجازيكم بخير….
أحلى طفولةمع أحلى زمان يا زمان… ايلا بغات تجي الموت غير تجي….
#عمتي_ طوطو
