عمتي طوطو تكتب.. منين كنت صغيرة وحكاية “رضيعتي”

0

فاطمة تفنوت

منين كنت صغيرة كانت عندنا واحد الجارة تايگولو ليها السكورية عمرني عرفت سميتها الحقيقية…. هاد جارتنا الله يذكرها بخير وايلا ماتت الله يرحمها كان ديما عندها على لسانها “رضيعتي” گلت لك أرضيعتي والله ما خبيتو عليك أرضيعتي راسي كان كايضرني ما كانفهم والو…

واحد خالتي حتى هي كاتلبس جلابتها ونگابها وتگول لولادها انا غادية عند رضيعتي…. واحد المرة وأنا نسولها علاش كاتگولي للسكورية رضيعتي؟؟ وهي تجاوبني حيت مرضعة الدريات مع ولادها وجاتني غريبة ديك الساعة وهي تشرح لي گالت لي دابا بناتي وولادها مراضعين مع بعضياتهم يعني راه خوت وحرام يتزوجوا مع بعضياتهم … وانا نكول ليها ياك حتى أنا مراضعة معاهم… ناري وهي تگولي لا … ناري علاش مارضعاتنيش معاهم باش حتى هما يكونوا خوتي هههه

وفي العشية منين جات أختي السعدية مسكينة من الخدمة وانا نعاود ليها وهي تگول لي انت راه مرضعاك لالة الله يرحمها مع حداوية وزيانية… إذن انا عندي خوتي من اولاد زيان ومن اولاد حدو هههه شكون فيكم الخوت زياني شكون فيكم حداوي…. خوتي ههههه…
من بعد حتى كبرت عاد عرفت بايلا جارتنا السكورية سميتها ” زهرة “….
وللحديث بقية مع
#عمتي_ طوطو

اترك رد