ماشي مجلس مدينة الدار البيضاء ، يا سيدي علك ، باركين ما كاين ما يدار.
اش نديروا ما نديروا ، دواوا مني منك ، اش كال فيها الله كاع الى جبنا البنك الدولي يسكن عدنا ، بداوا يسولوا بعضياتهم كي غانديروا ما غانديروا، أجي شحال تسلفوا من عندوا دوك للي دازوا قبلنا ، ناضوا العولاما للي فايت فيهم المجلس ، قالوا راه تسلفوا 200 مليار ..
نقزوا العولاما الجداد قالوا ياك حنا ناشطين ناشطين ويالاه مضبرين على طوموبيلات جداد ، ها الاودي ها البي ام ، وكلشي من عندهم ، علاش للي ما نطولوش لقصارى وناخدوا وا حد الكريدي جديد حتى حنا ب100 مليار ، وها البنك ناشط وحنا ناشطين ومال البنك الى سكن عندنا اش غ يوقع كاع ف ملك الله ، ياك حنا والسكان ع دايرين ف السوق ، ومال البنك مايدورش معنا ، وها كلشي مقصر و ب النكليزية والدولار ت هو ..
نقز واحد لفهايمي عميق قاليهم ، اودي راه انتوما كون قابلتوا المداخيل المالية ديالكم ،راه انتوما تسلفوا البنك الدولي ، راكم كتسالوا ف الرسوم والاكرية واحتلال الملك العمومي وغيرها كثر من 1000 مليار ، راه تصيفطوا ع لعساس يجمعها لكم ،
وهما يعربطوا عليه ، والنت شكون ولاش كدير راسك عايق، حنا اسيدي خاصنا نكريديوا واش غ تخلص شي حاجة من عندك ياك الدولة قادة على شغلها ، ومالك كطير ، وباغي تخدمنا حنا راه ع مرحلة وندوزوا ونمشيوا فحالنا ، جاوبهم قاليهم اودي راه غ تخرج ع من عند الشعب للي غ نرهنوه ف الكريدي ، وهما يلكاوه ، واديها فسوق .. وعاودت ع ل …
الاخوان هده حكاية افتراضية ، الواقع ان مجلس المدينة غ ياخد 100 مليار كريدي من عند البنك الدولي ، وسبق للمجلس السابق خدا 200 مليار ، هاهم يغرقون الدار البيضاء والاجيال القادمة ، لا فرق بين شعار سابق وشعار حالي ، كل في فلك الفشل يسبحون …
المهم لخبار فراسكم ، نسيت ما قلتش ليكم راه كراوا طوموبيلات جديدة ، وراه نهار الخميس ماكانتش دورة كان عيدميلاد ديال الطوموبيلات ، ودائما سعدات للي كيفورني الحلوة والما المعدني واتاي والقهوة نهار الدورة هو لمعلم وهو للي طالعة ليه، المسيرين كيعرفوا أهمية لحلاوة وا خا لحناش ، والساكنة راها ماجلة الحياة ت يساليوا لحناش..
