“الطبقية الجمعوية” .. امتحان كبير قدام والي الدرالبيضاء و عمدة المدينة نبيلة ارميلي

غدا من المفروض تجتمع لجنة متابعة أشغال وتسيير مركب محمد الخامس ، وهي لجنة تصوبات ف 2015 وفيها ممثلين عن مجلس المدينة والشركة المسيرة .. للي زوين أن  هذه اللجنة ماعمرها تجمع لها الشمل من نهار تشكلات ، ولكن بسبب الفوضى الاكتظاظ للي عرفو دونور ف المباريات الأخيرة للرجا والوداد قررات انها نجتامع باش تلقى شي حلول …

هاد اللجنة ما خاصهاش تقولبنا وتجتمع من اجل الاجتماع والتمثيل علينا حينت خرجات بلاغات ديال جمهور الرجا والوداد ، بل خاصها تجي وتعطينا التشخيص كامل وتعطينا حقيقة الأرقام المالية للي تخسرات على المركب وتجاوب واش الاصلاحات للي كانت فيه دارت كلها وبشكل مزيان أو لالا ، لأن البرنامج التنموي ديال الدارالبيضاء كان خصص 22 مليار من اجل الإصلاح واحنا باقي كنشوفو المشاكل ، و22 مليار كان ممكن نبنيوا بها جوج ديال الملاعب ماشي غير نصلحو دونور للي باقي كل مرة خارج لنا منو مشكل … وباش تكون هاد اللجنة نزيهة ومرضية مع الله فهاد رمضان تعاودلنا أش طاري تحت الارض ديال الملعب بتقرير واضح وشفاف ويخرج للعلن ..

باش نوضح اكثر أ الإخوان ، ف الوقت للي هاد الجمهور كيضرب الطرقان والسرويات والشباب كيخلي دم جوفو باش يدبر على ثمن تذرة الدخول ، ويوفر الملاين ديال الدراهم للفريقين ولمجلس المدينة والتلفزيون وشركات الإشهار واحيانا تايوصل للدارديالو مكرفس ، ماشي غير هادشي بل انه يصنع الفرجة يسوق من خلالها للمدينة إلى العالم حبا في وطنه وفرقه..

تحت ديك المدرجات للي هازا اجساد تجاهد لخلق فرجة ومنح صورة جميلة لكرتنا الوطنية ، وبالضبط لهذا المرفق ، تحتهم مباشرة يوجد كنيز عظيم جدا ، يتنعم فيه السلايتية الكبار ديال الغنائم ، والغنيمة هي قاعات مريحة فسيحة رحبة طويلة عريضة تستفيذ منها جمعيات بعينها ، وهي جمعيات لا تشبه الجمعيات كما اريد لها ، في الوقت الذي تتعافر فيه جمعياتنا الشعبية الثقافية منها والاجتماعية لإيجاد غرفة لأنشطتها نجد هؤلاؤ يتجبدون تحت تيران بكامله ، يسير باموال وعرق ابناء الطبقات المطحونة والهشة فأي حظ هذا واي نعيم ، وأي صمت غادر من لدن المدبرين ، ما يجب الجواب عنه من المؤتمنين على تدبير شؤوننا الجماعية هو كما يلي ، بعد طبعا تهييء تقرير جدي وواضح حول ما يعرفه الملعب من فوضى تنظيمية :

-من تكون الجمعيات المستفيدة من الكعكة التحتية ؟
-ماهي المعايير التي على أساسها استفادت من مرفق ملك للمدينة وساكنتها ؟
– لماذا طاح الزهر ع فيها وليس في غيرها ؟
-هل هناك مساواة بين الجمعيات ام ان هناك طبقية يجب ان تعلن حتى تعرف الجمعيات المنكوبة وجهها ف المرايا ؟
– إذا كان هناك من إفراغ لها متى سيتم ؟
– وهل ستعوض بمقرات أخرى إذا كان الجواب بالإيجاب السؤال هو علاش ؟ وعلاش هي تاخد وباقي خلق الله ف الجمعيات الأخرى يشد الصف؟

– وف الأخير خاص المجلس يعطينا جميع العقارات المستغلة من لدن جمعيات بذاتها بما فيها مدارس وغيرها
هذا هو اول امتحان حقيقي لهاد المجلس ومعه السلطات