الدرجة زيرو د يال السياسة عندنا…
المراكعة الإعلامية اللي كينشطوها هاد الأيام نجوم البوز السياسي بخصوص مستقبل السياسية فالبلاد بعد الخروج من هاد القرينة الكحلة كيبين أننا مزااال غادي نتفرجوا فمقابلات فدوري السياسة للدرجة الرابعة.
كولشي رد البال أنه كاين واحد الفرقة كتقترح وكتدافع على ما يسمى بحكومة إنقاذ وطنية حيث الوضع لي غادي يعيشو المغرب غادي يكون صعيب. وهاد البلان طبعا كيعني أن الانتخابات خاصها تأجل وأن هاد الحكومة خاص تكون فيها كفاءات ماشي ضرورية تجي من الأحزاب حيث تبين أن السياسيين ضعاف وميقدروش على شغالات الكبار…ومور هاد البلان كاين واحد الحساب مورق مزيان: فأحسن الأحوال السياسين كاملين غادي يديروا المظلة لرجال المخزن لي غادي يشدوا السوارت ديال الوزارات والميزانيات والتعييينات…
وحتى حزب العدالة والتنمية لي تمعش وضبر على وليداتو فالمرحلة السابقة غادي يطيح من الوزن ديالو وغادي يكتفي بالفتات….وهاد الديكور كامل كيعني أن البلاد غادي تحكم مباشرة بأجهزة الدولة وبشكل مفضوح وأن السياسة غادي تدوز للقبر مباشرة من بعد ما كانت عايشة غي بالتنفس الاصطناعي.
الفرقة الثانية كتقول أن هادشي غي تخوار سياسي والدولة والملك محتاجين للبارشوكات السياسية باش الوضعية الصعيبة لغادي تعيشها البلاد ميمسحوهاش المغاربة مباشرة فالقصر وأعمدة النظام وباش الموغرب ميعطيش صورة وميساج خايب للخارج. …
وطبعا هاد البارشوكات خاص تكون مضمونة وتخلي الفهامات ديالها فالتاسيع وتطبق برنامج صاحب الجلالة بالحرف والفاصلة. ومور هاد الفهامة كاين عاوتاني واحد الحساب لي هو أن الأجهزة ومنطقها الأمني غادي يرجعوا لبلاصتهوم ويديرو غي خدمتهوم وميتعداوش على الخدمة ديال صحاب السياسة. وصحاب هاد الهضرة مباغيينش يشريوا الكفن للسياسة ولكن باغيينها فنفس الوقت تبقى ساكنة فقسم الإنعاش.
هاد الماتش اللعابة لي كيلعبوه وكنشوفوهم فالفيسبوك واليوتوب كيشيرو على بعضايتهوم هوما مثلا البكوصة سلامة الناجي لي كتنعت فرقة حكومة الإنقاذ الوطنية بالمشاورية وكتعطي الدروس فالملكية البرلمانية والدولة العميقة وخطورة قتل الأحزاب وحكم الأجهزة وكتهمهوم بلي باغيين يخرجو على الماليك… وهوما مثلا شي صوحافيين خدامين عند الأحداث المغربية كيسميوا مايسة بالشيخة ولا شي أساتذة جامعيين وباحثين خدامين فالفايسبوك نهار وما طال وهوما كيجمعوا بالنصوصا صحاب السياسة وهازين على كتافهوم الميدة لي مربعين فيها صحاب الحال.
دابا واش هاد اللعابة غي مقصرين ولا لاعبين ماتش رسمي؟ شخصيا كيضهر أن هاد البلانات بزاااف عليهوم وميزعموش عليها غي من راسهوم وفغالب الأحيان غادي يكونوا كيطبقوا الخطة ديال المدربين ولي أصلا ميمكنش يكونوا فالأحزاب السياسة.
الخطة السياسية فالبلاد كانت ديما كتصنع فدار المخزن وكتحكم فيها بشكل كبير التوازنات لي كاينة داخل هاد الدار وماشي بعيد يكون هاد الفيلم كامل مصنوع من صراع المواقع بين رجال الحاشية الموجودين فالدائرة الأولى.
الموشكيل هو أن هاد اللعب مفروش ومتفرجين فيه الناس وميقدرش يخلق شي متعة ويغري بنادم باش يتبعو. وحتى هادوك النجوم ديال البوز السياسي راه بنادم عارف معامن خدامين وعلاش خدامين ومقصر ومدوز بيهوم الوقت حيث مكاينش بزاااف ميدار فهاد الوقت.
بنادم راه ماشي حمار وفاهم أن الموغريب مزااال فالدرجة الصفر من السياسة ومني كيبغي يتفرج فشي نيفو واعر كيقلب البرابول لشي بطولة أخرى.
