أنا من أعددت مشروع قانون”سد فمك” إلى الأبد..وبالفور ياشيفور والمشروع غ يدوز بزز!!
أنا من أاعددت وقدمت مشروع قانون”سد فمك”الى الابد، وبالفور يالشيفور،وحتى حد من قبل مني ماعندو الجبهة اللي عندي باش يقدر يقدم مشروع بحال هذا، كيفرع الطرح وكيسد التنافس.
وداكشي اديال الحزب مالحزب هذاك اشغلنا احنا اللي قابطين سوارتو والناس راضيين علينا ويمكن كاع الى خرجت عندهم دابا يصفقو عليا ويهزوني فوق لكتاف، وخا فالحقيقة ماعرفت اشحال هما اللي باقيين معانا. ونجيك ملخر، انا قاضي الغرض ومدور الحركة ومهلي فاللي داير يد الله معايا، ومن بعدي الطوفان. يكون الحزب ما يكونش هذا ماشي مهم، يبقى تاريخو ما يبقاش، هذي هدرة قديمة، اللي كتهمو يمشي للمقبرة يزور ويشوف واش تنفعو الزيارة.
هدشي اللي عطا الله والسوق، بلا ما نكثرو فالهدرة اللي ما شرات خضرة، واللي ماعجبو حال عليه ب”الباتيرا” يورينا ظهرو، هذا لبلاد خصها تبقى اللي كيعارفو ليها وكيطلعو من الريال الف ريال بالفن بلا مايبرزطوهوم شي شماكرية ما شابعين حتى الخبز فكرشهم بالنكير الخاوي. هذاكشي اديال اضصارة اديال فيسبوك ويوتوب وواتساب ماغادي نمشي حتى نفضي معاها وندخل شي ميات الف الحبس باش يكونو عبرة.
والمشروع غادي يدوز بزز من شي قيوش لاصقين ليا فشي هضرة اقديمة وبالية بحال داكشي اديال حرية الراي والتعبير وما عرفت اشنو خر اللي انا شخصيا ماللي كنسمع شي حد كيتكلم عليهم كتجيني امل حياتي، يعني الحكة. هذوك باقيين مساكن فعصر الحداثة، اما انا شخصيا، بلا منة عالله، راني مشيت بعيد في ما بعد الحداثة وما يمكنشي نرجع اللور.
هكذا تكلم مسؤول من جزيرة الوقواق ردا على من خولت له نفسه انتقاذ سعادته، والزعم بانه ماشي هو صاحب المشروع.
وكيبان ليا من بعد هذا الكلام خص اللي يتسحب ماشي فقط القانون، بل حتى المسؤول خصو يمشي باراكا عليه، اعلى حقاش غادي يولي مشكلة حتى هو، هذا الى الجزيرة ماشي غير غادية عالله والى الحزب اديالو باقية فيه شويا اديال النفس وما معلقش مستقبلو بشي شخص.
كل تشابه بين ماورد في هذه التدوينة واحداث واقعية هو محض صدفة. انا غير سجلت فكرة اولية “سينبسيس” اديال شي حاجة يمكن نطورها فالمستقبل بعد استكمال قراءة حلقات الصديق العزيز الدابري عن تقنيات كتابة السيناريو.
