تبادلا الرسائل.. بسمة بوسيل تردّ على رسالة تامر حسني لها
سارعت الفنانة بسمة بوسيل بالرد على رسالة لتامر حسني بعدما وجه لها رسالة خاصة بأنه يكنّ لها كل الاحترام والحب، بالإضافة إلى أنها شاركته في اختيار بعض الأغنيات.
وكتبت بسمة بوسيل عبر حسابها الشخصي بـ”إنستغرام” قائلة: “يا تيمو أنت كمان عندي زي ما أنا عندك وربنا يوفقك في شغلك”.
وكان تامر كتب عبر حسابه بـ”إنستغرام”: “ملاحظ إن في بعض التعليقات كل ما أنزل موضوع أغنية أو هزار معاكم، بعض الناس بيربطوه بحياتي الشخصية، ده غلط يا جماعة، أولا مش أنا اللي ممكن أعمل كده”.
وأضاف: “رغم الظروف الحالية… مازلت أكن لبسمة كل الحب والاحترام، ده غير إن هي شاركتني في اختيار أغانيا ومهما يحصل دي في دمي وأم أولادي وعلاقتنا كويسة جدا دلوقتي ولو طلبت عنيا مش هتأخر”.
وتابع: “تاني حاجة أنا بحب أهزر معاكم دايمًا من يوم طلوعي لو في أغنية أو نكتة حلوة أو إفيه حضر في دماغي أنا على طبيعتي معاكم، ثالث حاجة الفنان الحقيقي اللي بيعبر عن مشاعر كل الناس في كل حالاتهم، يعني أنا بفرح لما بلاقي أغانيا بتغنوها وإحساسها واصلكم، لأني بتعب عشان أكتب الكلام اللي نفسكم تقولوه إنتوا، ده لسة في أغاني توجع أوي نازلة قريب إن شاء الله.. كده مش هنزلها”.
يذكر أن آخر أعمال تامر حسني في السينما فيلم “بحبك”، الذى عُرض فى موسم عيد الأضحى 2022، وهو بطولة وتأليف وإخراج تامر حسنى وشارك فى بطولته هنا الزاهد وحمدى الميرغنى ومدحت تيخة وهدى المفتى، أحمد عزمى، وتميم عبده وسمر محمد متولى، وعمرو صحصاح وعاليا راشد، شهد الشاطر، وآخرين.
