مخطط مغرب الحريك؟!
انا معرفتش واش الدولة ديالنا عندها شي يد فهاد أكبر عملية تصدير الشباب لأروبا بواسطة قوارب الموت/الحياة، ولكن يلا كانت هاد الدولة تتغاضى أو تسهل أو…الهروب من الحزقة والحكرة فإني سأعيد النظر في قناعاتي وسأسلم بأن من يحكمنا لا تنقصه الحيلة وبعد النظر والفكر الاستراتيجي!
فأغلبية المغاربة شباب وشابات، وأغلبية هاد الأغلبية قاتلهوم الشوماج وخاصهوم ياكلوا ويشربوا وباغيين دار وطوموبيل وباغيين سكويلة وسبيطار وطريق مكادين وكيطالبو المخزن باحترامهم، وكلهم عاقو وفاقو وعارفين شكون لي صارط البلاد ومبقاوش كيتيقوا فديناصورات السياسة، وجزء منهم طلعات ليه القردة للسطح حتى ولا كيقول الموت ولا المذلة…
يلا زدنا على هادشي داكشي ديال الركود الاقتصادي وفشل دوك اللعيبات ديال مخططات الألوان(أزرق وأخضر…) وهاديك التقميرة الكبيرة ديال أفريقيا وديك القلبة ديال السعودية….غادي يكون تصدير الشباب العايق والمبرزط والمكلف لأروبا عملية مربحة بامتياز، علاش؟؟؟
حيث غادي نتهناو من صداعو بكل بساطة ونقدروا نضبروا على شي أورويات من أوروبا ونقدروا حتى نجنيوا شي مكاسب سياسية غير مباشرة. ومن المؤكد أن هاد الاستتثمار فالهجرة غادي تكون عندو أثار إيجابية فالمستقبل حيث هادو لي كنصدروهوم غادي يرجعوا لينا زوينين وغادي نقولو ليهوم مرحبا حيث جابو معاهوم الكرمومة ومضبرين على العائلة فالبلاد…
زعما وبالمختصر المفيد، يلا كانت الدولة كتفكر هاكدا راه دوك مؤسسات البحث الاستراتيجي وتدبير الأزمات لي كاينة فالدول الكبرى خاصها تسد البيبان وتسيفط لينا الطلاب ديالها نقريوهوم كيفاش يقدروا يحولوا بسهولة مآسي الناس إلى أرباح سياسية واقتصادية….
وفالأخير كنتمنى أن الدولة المغربية تكلف عاوتاني عزيز أخناشون بتدبير هاد المخطط ديال الحريك لما له من تجربة في تدبير المخططات الفاشلة، والسلام عليكم ورحمة الله تعالى وبركاته.
